- మంత్రి నారా లోకేష్‌ పునరుద్ఘాటన
- ఇన్వెస్ట్‌మెంట్‌ ట్రాకర్‌ పోర్టల్‌ను పకడ్బందీగా తీర్చిదిద్దాలి
- ఉద్యోగాల కల్పనకు ప్రతి పాలసీలో సంస్కరణలు
- ఎంఎస్‌ఎంఈలకు పెద్దఎత్తున ప్రోత్సాహం
- మంత్రుల ఉపసంఘం సమావేశంలో మంత్రి లోకేష్‌ దిశానిర్దేశం
అమరావతి (చైతన్యరథం): రాష్ట్రంలో 2029 నాటికి 20 లక్షల ఉద్యోగాలు కల్పిస్తామని విద్య, ఐటీ శాఖల మంత్రి నారా లోకేష్‌ పునరుద్ఘాటించారు. 20 లక్షల ఉద్యోగాల కల్పనపై ఏర్పాటుచేసిన మంత్రుల ఉపసంఘం రెండో సమావేశం సోమవారం ఉండవల్లి నివాసంలో జరిగింది. ఇప్పటివరకు వచ్చిన పెట్టుబడులు, ఉద్యోగాల కల్పనతో పాటు వివిధ ఎంవోయూల స్థితిగతులపై అధికారులు పవర్‌ పాయింట్‌ ప్రజెంటేషన్‌ ద్వారా వివరించారు. ఇప్పటివరకు కుదుర్చుకున్న ఒప్పందాల ద్వారా రూ.8,73,220 కోట్ల పెట్టుబడులు వచ్చే అవకాశం ఉందని, తద్వారా 5,27,824 మందికి ఉద్యోగాలు వచ్చే అవకాశాలు ఉన్నాయని వివరించారు. మంత్రుల ఉపసంఘం ఛైర్మన్‌ హోదాలో అధికారులకు మంత్రి లోకేష్‌ దిశానిర్దేశం చేశారు. ఈ సందర్భంగా మంత్రి మాట్లాడుతూ.. ఇన్వెస్ట్‌మెంట్‌ ట్రాకర్‌ పోర్టల్‌ను సమర్థవంతంగా తీర్చిదిద్దాలని ఆదేశించారు. భూకేటాయింపులు, అనుమతులకు సంబంధించిన అన్ని వివరాలు ట్రాకర్‌లో ఉంచాలన్నారు.
ప్రతిబంధకాలు తొలగించేలా సంస్కరణలు
పెట్టుబడులు పెట్టాలనుకునేవారికి ప్రతిబంధకంగా మారిన విధానాల్ని సంస్కరిస్తామని చెప్పారు. ఉద్యోగాల కల్పనకు ప్రతి పాలసీలో సంస్కరణలు తీసుకురావాల్సిన అవసరం ఉందని ఈ సందర్భంగా అభిప్రాయపడ్డారు. అంతర్జాతీయంగానూ, దేశంలోనూ ఉన్న అన్ని పెద్ద కంపెనీలను రాష్ట్రంలో పెట్టుబడులు పెట్టడానికి ఆహ్వానించాలన్నారు. రాష్ట్రంలో ఇప్పటికే పెట్టుబడులు పెట్టిన కంపెనీలు మరింతగా విస్తరించేలా వారిలో నమ్మకం కల్పించాలని, వారికి ఇవ్వాల్సిన రాయితీలు, ప్రోత్సాహకాలు ఇవ్వాలన్నారు. రాష్ట్రంలో పెట్టుబడులు పెట్టేందుకు పలువురు పారిశ్రామికవేత్తలు ఆసక్తి చూపిస్తున్నారు. వారికి అవసరమైన భూకేటాయింపులతో పాటు అనుమతులు, రాయితీలు త్వరితగతిన మంజూరు చేయాలి. ఎంఎస్‌ఎంఈ రంగంలో భారీగా ఉపాధి, ఉద్యోగాల కల్పన జరుగుతుంది. ఎంఎస్‌ఎంఈలను పెద్దఎత్తున ప్రోత్సహిస్తాం. ఐటీఐ, పాలిటెక్నిక్‌ల ద్వారా పరిశ్రమలకు అవసరమైన మానవ వనరులను అందించాలి. పోర్టుల అభివృద్ధిపైనా దృష్టి కేంద్రీకరించాలి. టూరిజం రంగంలో పెట్టుబడుల ఆకర్షణపై ప్రత్యేక దృష్టి పెట్టాలని మంత్రి లోకేష్‌ సూచించారు. మైనింగ్‌ రంగంలోనూ విస్తృత అవకాశాలు ఉన్నాయని, ఈ రంగంపైనా దృష్టిసారించాలని దిశానిర్దేశం చేశారు.
ఈ కార్యక్రమంలో పరిశ్రమల శాఖ మంత్రి టీజీ భరత్‌, విద్యుత్‌ శాఖ మంత్రి గొట్టిపాటి రవికుమార్‌, పట్టణాభివృద్ధి శాఖ మంత్రి పీ నారాయణ, ఎంఎస్‌ఎంఈ, సెర్ప్‌ శాఖల మంత్రి కొండపల్లి శ్రీనివాస్‌, గనుల శాఖ మంత్రి కొల్లు రవీంద్ర, ఉన్నతాధికారులు అజయ్‌ జైన్‌, ఎన్‌.యువరాజ్‌, కాటమనేని భాస్కర్‌, ప్రవీణ్‌ కుమార్‌, సాయికాంత్‌ వర్మ, ఎమ్‌.అభిషిక్త్‌ కిషోర్‌, తదితరులు పాల్గొన్నారు.
