సచివాలయంలో అగ్నిప్రమాదం

• రెండో బ్లాకులో ప్రమాద ఘటన
• పరిశీలించిన సీపం చంద్రబాబు
• పూర్తిస్థాయి విచారణకు హోంమంత్రి ఆదేశం
• తుళ్లూరు పీఎస్‌లో కేసు నమోదు

అమరావతి (చైతన్య రథం): ఏపీ సచివాలయంలో అగ్నిప్రమాదం చోటుచేసుకుంది. రెండో బ్లాక్‌ బ్యాటరీలు ఉంచే ప్రాంతంలో ఈ ఘటన సంభవించింది. ప్రమాదాన్ని గుర్తించిన వెంటనే ఎస్పీఎఫ్‌ సిబ్బంది అగ్నిమాపక సిబ్బందికి సమాచారం ఇచ్చారు. వారు ఘటనాస్థలికి చేరుకుని మంటలను అదుపులోకి తీసుకొచ్చారు. సచివాలయంలోని రెండోబ్లాక్‌లోనే డిప్యూటీ సీఎం పవన్‌కళ్యాణ్‌, మంత్రులు అనిత, పయ్యావుల కేశవ్‌, నాదెండ్ల మనోహర్‌, కందుల దుర్గేష్‌, ఆనం రామనారాయణరెడ్డి, నారాయణ పేషీలు ఉన్నాయి.

ప్రమాద ప్రదేశాన్ని పరిశీలించిన సీఎం చంద్రబాబు
వెలగపూడి సచివాలయంలోని రెండవ బ్లాక్‌లో తెల్లవారుజామున సంభవించిన అగ్నిప్రమాద ప్రదేశాన్ని ముఖ్యమంత్రి చంద్రబాబు పరిశీలించారు. సీఎస్‌ విజయానంద్‌, డీజీపీ హరీష్‌ కుమార్‌గుప్తా, హోంమంత్రి అనిత, జీఏడీ పొలిటికల్‌ సెక్రటరీ ముఖేష్‌ కుమార్‌ మీనాతో కలిసి సీఎం చంద్రబాబు పరిశీలించారు. అగ్నిప్రమాదం ఎలా జరిగిందని, ఏ సమయంలో చోటుచేసుకుందని సీఎం అధికారులను అడిగి తెలుసుకున్నారు. ముఖ్యమైన ప్రాంతాల్లో ప్రతిచోటా సీసీ కెమెరాలు ఏర్పాటు చేయాలని, తద్వారా ప్రమాదానికి గల కారణాలు తెలుసుకోవడానికి అవకాశం ఉంటుందని అన్నారు. అగ్నిప్రమాదం జరిగిన ప్రదేశానికి ఫోరెన్సిక్‌ బృందం ఎన్ని గంటలకు వచ్చిందని అడిగారు. ప్రమాదానికి గల కారణాలను తెలుసుకునేందుకు అవసరమైన ఆధారాలను సేకరించిందీ లేనిది అడిగారు. సచివాలయంలో అన్ని చోట్లా భద్రతా ప్రమాణాలన్నీ పాటిస్తున్నారా? లేదా? అన్నది ఆడిట్‌ చేయాలని సూచించారు. అనంతరం మొదటి బ్లాక్‌లోని బ్యాటరీ రూమ్‌ను కూడా సీఎం పరిశీలించారు. ఇటువంటి బ్యాటరీ గ్యాలరీనే రెండవ బ్లాక్‌లో అగ్నిప్రమాదానికి గురైందని సీఎంకు సీఎస్‌ వివరించారు. అనంతరం సీఎంఆర్‌ఎఫ్‌ విభాగాన్ని పరిశీలించారు. అక్కడి అపరిశుభ్రతపై అసంతృప్తిని వ్యక్తం చేసిన సీఎం, 24 గంటల్లో చెత్తనంతా క్లీన్‌ చేయాలని ఆదేశించారు. పని ప్రదేశాల్లో ఎక్కడా తాత్కాలికంగా కూడా చెత్త కనబడటానికి వీల్లేదని అన్నారు.

పూర్తిస్థాయి విచారణకు హోంమంత్రి ఆదేశం
ఈ ఘటనపై హోంమంత్రి మంత్రి అనిత ఆరా తీశారు. బ్యాటరీలు ఉండే ప్రదేశంలో ప్రమాదం జరిగినట్లు అధికారులు ఆమెకు వివరించారు. ఘటనపై పూర్తిస్థాయి విచారణకు మంత్రి ఆదేశించారు. బ్యాటరీ, యూపీఎస్‌ రూంలో ఫైర్‌ అలారం లేకపోవడంపై అనిత ఆరా తీశారు. సచివాలయంలోని అన్ని బ్లాక్‌ల్లో ఫైర్‌ అలారాలను తనిఖీ చేయాలని సూచించారు. మరోవైపు ప్రమాదంపై తుళ్లూరు పీఎస్‌లో కేసు నమోదైంది.